Абраз “Маці Божая Апякунка лясоў” з’явіўся ў нашым касцёле 22 траўня. Асвечаны Апостальскім Нунцыям у Беларусі Антэ Ёзічам падчас урачыстай Святой Імшы.
Аўтарам унікальнага абраза стаў заслужаны дзеяч мастацтваў Рэспублікі Беларусь Мікалай Кузьміч. Праца над абразом Маці Божай Апякункі лясоў, выкананым у старадаўняй тэхніцы ў візантыйскім стылі, працягвалася сем месяцаў. Асноўнымі матэрыяламі іконы з’яўляюцца золата, срэбра, каштоўныя і паўкаштоўныя камяні. Зварот абраза зацягнуты тканінай, якая была зроблена на заказ Камбінатам дэкаратыўна-прыкладнога мастацтва ім.М.Кішчанка ў Барысаве. Арнамент на ёй выкананы па матывах Слуцкіх паясоў. Блакітнымі літарамі падпісаны тытул абраза на лаціне: Mater Dei Silvarum Patrona. На абразе — фігура Маці Божай на фоне лясоў, а таксама пружанскага касцёла і шляхецкага “Палацыка” ў Пружанах.
Абраз з такім тытулам – адзіны ў свеце. Пружаны – гэта Палескі край, які многія называюць „лёгкімі Еўропы“. Таму менавіта тут будзе захоўвацца гэты абраз.
Абраз “Маці Божая Апякунка лясоў” можна лічыць цудадзейным, бо праз малітвы, звернутыя да Панны Марыі перад гэтай іконай, ужо здзейснены цуды аздараўлення. На знак падзякі за аздараўленне людзі пакідаюць каля абраза каштоўныя дары – воты, якія мы бачым таксама каля нашага абраза.
Адзін з цудаў – аздараўленне нашай парафіянкі ад кавіду. Падчас эпідэміі яна моцна захварэла і трапіла ў шпіталь. Уся парафія шчыра малілася ў інтэнцыя аб яе выздараўленні, але стан жанчыны толькі пагаршаўся. Калі яна ўжо не магла самастойна дыхаць і лекары падключылі яе да апарату штучнай вентыляцыі лёгкіх, хворая жанчына звярнулася да Маці Божай Апякункі лясоў: “Ты маеш столькі кіслароду! Дай і мне яго крыху!” Наступную раніцу жанчына сустрэла, самастойна дыхаючы, і пасля той ночы хутка пайшла на папраўку.
22га чысла кожнага месяца ў нашым касцёле адбываецца адмысловае малітоўнае набажэнства ў гонар Маці Божай Апякункі лясоў. Запрашаем кожнага далучацца да малітвы. Таксама можна адправіць нам сваю інтэнцую, звернутую да Маці Божай Апякункі лясоў праз спецыяльную форму ў шапцы сайта, праз Instagram ці e-mail. Будзем рады далучыць вашы інтэнцыі да нашай малітвы!
